D’R VÖLSER VAN ’T JOAR 2026

CV de Grensülle Vols jratteliert de Koninklijke harmonie St. Cecilia 1836 Vaals (bèsser bekaand onger d’r naam ” de Moeziek va Vols”) mit ’t oesrofe als “Völser van ‘t joar 2026”.

De Harmonie St. Cecilia viert dis joar hön 190 jöaresj besjtoa en sjteet ooch at al die joare ömmer wier jereed veur de Völser jemainsjaf.  Die antsaal joare sjteet de Moeziek  – zoe wie me zèt- i dèngs van ozer jemaisjaf en sjpeëlt zoe de mieë wie wiesjtieje röl va verbèngende faktor beej tsiesj evenemènte.

Mit name de Grensülle könne ömmer wier ‘ne beroof óp de Moeziek doeë en de tsezame-wèrkoeng mit de Moeziek ken zisjer als prima betieteld weëde beej jans jèt zaachens. Va proklamatsioeën bis óptsooch,van ’t rejele va zaachens mit d’r exploitant van d’r Obelisk bis ’t övverleisj mit de jemèngde. 

Allèng al öm die reë is ’t mieë wie risjtiesj dat de Moeziek dit joar als “Völser van ’t joar” weëdt oes-jerofe!

De Moeziek beijdt de Völser jemainsjaf jèddes joar wier tsiesj momente öm tse könne jenisse va hön moeziekaliesj könne: dènk me an ’t Open Air Concert, ’t Maestro Concert, d’r Amikayo mars of ’t Concerto Mediterrano. ‘ne Absolute höhepoenkt in ’t verainsjoar van de Moeziek is al hieël jèt  joare “de Hub Deitz Carnavalsrevue”. Heej weëde hoemoor, jezaank, moeziek en ozer dialèkt tse zame jemiesjt en ömjezatse in ’n soeper veursjtelloeng oes-jevuurd deursj de eije verainsmietjlieder. Vier  Oesverkoade veursjtelloenge bewieze ömmer wier de kwaliteët van die revue.

De moeziek maat ooch hieël veul werek van ’t sjoeële va nuij moeziekante. Doaveur is onger angere ’n eije “blazersklas” in ’t leëve jerofe, dat nit allèng veur moeziekongerisjt sjteet, mè ooch veur de èntwikkeloeng van zotsiale kèntnisse.

Doanevve hat de Moeziek ooch ‘n “Jeugdharmonie”, ’t orkes woa de mietjlieder weëde ópjeleid veur de “risjtieje” Moeziek.

Vanaaf 2024 hat de Moeziek ooch e “nieuw talent orkest”, e orkès veur volwase luuj die at ömmer d’r woonsj hauwe e insjtroemènt tse wèlle sjpeële. E orkès ooch woa de deelnemmere liere öm noeëte tse leëze, de liebe veur e insjtroemènt tse èntwikkele en zoeë tse liere moeziek tse maache, èng van de sjönste muijeliesjhete van de mensjheed öm tse èntsjpanne.

Moeziek va Vols, namens alle Völser va hatse jejrattelierd!